Fjala e Drejtorit të Përgjithshëm

Shërbimi i Provës është një institucion që mbikëqyr dënimet alternative dhe synon të riintegrojë personat që kanë kryer vepra penale, duke parandaluar përsëritjen e tyre dhe krijuar një ambient më të sigurt për shoqërinë. Në Suedi, individët që trajtohen me programe rehabilitimi dhe riintegrimi social, në bazë të vendimeve gjyqësore, quhen “klientë” nga Shërbimi i Provës. Ky term lidhet me përpjekjen për rehabilitim dhe shmangien e etiketimit si të dënuar. Në Shqipëri, ligji nr. 78/2020 përdor termin “person nën mbikëqyrje”. Ky ligj synon të mundësojë rehabilitimin dhe riintegrimin social të këtyre personave, të parandalojë krimet dhe të ulë rrezikun e përsëritjes së tyre, të reduktojë kostot sociale dhe të mbrojë interesin publik.

Puna e palodhur dhe përkushtimi i stafit tonë kanë bërë të mundur integrimin social të shumë personave nën mbikëqyrje, duke ulur recidivizmin dhe duke siguruar shërbime cilësore në çdo fazë të procesit. Vëmendja jonë është përqendruar veçanërisht tek trajtimi i të miturve, për të shmangur dënimet penale dhe për t’u ofruar atyre rehabilitim përmes ndihmës së menjëhershme dhe efikase, bazuar në Strategjinë Kombëtare për të Miturit dhe praktika të tjera të vlefshme.

Arritjet e Shërbimit të Provës gjatë viteve janë inkurajuese, por jemi të vetëdijshëm se kjo është një punë e vazhdueshme dhe komplekse. Kjo kërkon jo vetëm një staf të përkushtuar dhe me ekspertizë të lartë, por edhe një koordinim të gjerë institucional me organe shtetërore dhe organizata partnere, si brenda ashtu edhe jashtë vendit. Ne jemi të angazhuar të përmbushim misionin tonë ligjor dhe të kontribuojmë për një shoqëri më të sigurt, që respekton vlerat njerëzore dhe ofron mundësi të reja për ata që kanë qenë në konflikt me ligjin.

Ermal PACAJ

Fjala e Drejtorit të Përgjithshëm

Kontakt

Vendodhja