Grupi i punës i përbërë me anëtarë nga Shërbimi i Provës dhe AKSHI vijojnë takimet për përcaktimin e termave të referencës për implementimin e sistemit të Mbikëqyrjes Elektronike. Me ane të këtij sistemi do të arrihet zbatim sa me i saktë i vendimeve të gjykatës duke monitoruar lëvizjet e personave nën mbikëqyrje elektronike, duke raportuar në kohë reale pozicionin e personave, dhe në këtë mënyrë do të evitohet mundësia e shkeljes së territorit të lejuar apo hyrja në zonën e ndaluar.
Kufizimet e përcaktuara në vendimin gjyqësor, mbikëqyren me anë të pajisjes e cila vendoset në trupin e personit nëpërmjet sallës operative ngritur për këtë qëllim. Pajisja i komunikon sallës operative daljen nga zona e lejuar apo hyrjen në zonën e ndaluar duke treguar vendndodhjen e personit të mbikëqyrur.
Mbikëqyrja elektronike përdoret për personat të cilët janë subjekt i :
– masave shtrënguese (Kodi Procedurës Penale, pikat a, c dhe d),
– dënimeve alternative (Kodi Penal, neni 58, 59, 59/a, 64 dhe Kodi i Drejtësisë Penale për të Mitur, neni 103)
– dënimeve plotësuese (Kodi Penal, paragrafi 7 i nenit 30)
– urdhrave të mbrojtjes ose urdhrave të menjëhershëm të mbrojtjes (ligj nr.9669, datë 18.12.2006 “Për masat ndaj dhunës në marrëdhëniet familjare”, të ndryshuar., neni 17 dhe 19)
